Federer humbet nga Djokoviq

Federer humbet nga Djokoviq
Numri një i tenisit botërorë, Roger Federer, është mposhtur nga numri tre, Novak Djokoviq, në gjysmëfinale të turneut Astralian Open, që fitoi në tre sete me rezultat 7-5, 6-3, 7-6.

Serbi ka shënoi fitore të papritur ndaj favoritit Federer, duke i dhënë fund edhe 10 finaleve në varg të zviceranit në turnetë e mëdha. Djokoviq në finale që do të zhvillohet të dielën, do të takohet me francezin Jo-Wilfried Tsonga, që po ashtu befasoi dje duke mposhtur spanjollin Rafael Nadal.

Federer, i cili kërkonte titullin e tretë në seri në Australian Open, nuk dukej të ishte lojtari i cili ka fituar 13 tituj “Grand Slam”. “Mendoj se ai fitoi pikët më të rëndësishme sot, isha i pafat”, ka thënë Federer. “Kjo varet shumë edhe nga forma ditore, nuk mundeni që gjithmonë të luani në formën më të mirë. Nuk ka dyshim që më herët kam luajtur më mirë”, ka thënë Federer.

“Jam thjesht mjaft i mahnitur që arrita të përballem me gjithë këtë presion sot”, ka thënë Djokoviq. “Në momentet më të rëndësishme, tregova lojën më të mirë që mundem”.

Në finalen e femrave, që do të zhvillohet të shtunën, do të takohen serbja Ana Ivanovic (numër katër) dhe rusja Maria Sharapova (numër pesë në tenisin botëror).