Xavi i sjell fitoren Barcelonës

Xavi i sjell fitoren Barcelonës
Përfaqësuesi i kombëtares së Spanjës, Xavi Hernandez, ka qenë faktori kyç i fitores minimale të Barcelonës ndaj Osasunës, fitore e që ngushton në gjashtë diferencën e pikëve me liderin e La Ligës, Real Madridin.

Xavi u kyç në lojë në minutën e 82-të si zëvendësim për Decon, ndërsa dy minuta para përfundimit të kohës së rregullt të ndeshjes (88’), arriti të shënojë edhe golin e fitores. Pas humbjes shokuese prej 2-0 të Real Madridit nga Almeria gjatë të shtunës, Barcelona me këtë fitore ngushton diferencën e pikëve në gjashtë dhe shton shpresat për fitimin e titullit të ligës.

“Kjo fitore është mjaft e rëndësishme për moralin tonë”, ka thënë trajneri i Barcelonës, Frank Rijkaard. “Nuk jam duke e ndjekur Realin mjaft, të jem i sinqertë. Ka avantazh dhe është në formë të mirë për momentin, por nuk jam i fokusuar atje”.

Nga ndeshjet tjera të La Ligës, Valencia ka fituar 2-0 në fushë të Valladolid, me golat e Mata (60’) dhe David Villa (72’), ndërsa fitore ka shënuar edhe Sevilla, me rezultat 2-1 ndaj Recreativos. Ekipi i tretë i radhitur në tabelë, Villarreal, barazoi me rezultat 1-1 në fushë të vet ndaj Mallorcës.