Milan barazon përballë Arsenalit, Manchester përballë Lyonit

Milan barazon përballë Arsenalit, Manchester përballë Lyonit
Ndeshja më interesante e rrethit të parë eliminator të Ligës së Kampionëve, ajo mes Arsenalit dhe Milanit e luajtur në Emirates, ka përfunduar me barazim pa gola, derisa barazim ka nxjerrë edhe Manchester United në fushë të Lyonit.

Arsenal megjithëse gjatë gjithë ndeshjes ishte shumë më sulmues, nuk arriti të prekë rrjetën e portierit të Milanit, Kalac. Pjesa e parë e ndeshjes ishte tërësisht e baraspeshuar, me Milanin që fillimisht sulmoi dhe që më pastaj la radhën e sulmit për vendasit.

Pjesa e dytë i takoi në shumicë Arsenalit që pati mjaft raste të mira shënimi, përfshirë edhe një shtyllë me kokë nga Adebayor në sekondat e fundit të ndeshjes, e që për fat të italianëve nuk mbaroi në rrjetë.

Ndeshja ishte “dhimbse” për të dyja ekipet që pësuan nga një lëndim. Së pari Kolo Toure pësoi dëmtim nga një gjuajtje e fuqishme me top e Alexandre Patos, pas shtatë minutash lojë, ndërsa në pjesë të dytë u lëndua edhe Pato.

Barazimi pa dyshim është në favor të kampionit në fuqi të kësaj gare, Milanit, që pas dy javësh pret në San Siro liderin e Premierligës angleze.

Barcelona rikthen rezultatin

Barcelona është rikthyer nga disavantazhi 2-1 në pjesë të parë, për të fituar me rezultat 3-2 në ndeshjen si mysafir i Celtic. Goli i parë erdhi përmes Hesselink (16’), ndaj të cilit u përgjigj Messi vetëm pas dy minutash (18’). Por Robson shfrytëzoi një dalje të portierit spanjoll Valdez për të shënuar një gol të bukur me kokë dhe për të risjellë avantazhin për ekipin skocez (38’).

Pjesa e dytë solli edhe golin e barazimit për ekipin spanjoll, që u shënua nga Henry (52’), ndërsa vendimtar në fitoren e Barcelonës ishte Messi, i cili 12 minuta para fundit të ndeshjes shënoi golin e dytë të tij, i cili ishte edhe goli i fitores (79’).

United nxjerr barazim të vlefshëm

Kampioni i Anglisë, Manchester United, nuk arriti të tregojë lojë aq bindëse në ndeshjen përballë kampionit të Francës, Lyonit, duke nxjerrë barazim 1-1, që megjithatë shkon në favor të Djajve të Kuq.

Të dy golat e ndeshjes erdhën në pjesën e dytë. Francezët kaluan të parët në epërsi me golin e Karim Benzema (54’), ndërsa Mancehster u përgjigj me anë të argjentinasit Carlos Tevez, në minutat e fundit të ndeshjes (87’).

Fenerbarhce shënon fitore

Ndeshje interesante dhe me plot gola ishte edhe ajo mes Fenerbahces dhe Sevillas. Turqit e Fenerbahces kanë kaluar të parët në epërsi me anë të Kezman (17’), por spanjollët barazuan me një autogol të Dracena disa minuta më vonë (23’), me të cilin rezultat, 1-1, përfundoi edhe pjesa e parë.

Pjesa e dytë ishte po aq dinamike, ndërsa edhe me një gol më shumë, gjithsej 3. Lugano së pari barazoi për Fenerbahcen (57), por afro dhjetë minuta më vonë Sevilla sërish barazon me anë të Escude (66’). Goli i Semih ishte vendimtar për fitoren e ekipit turk, që erdhi tre minuta para fundit të kohës së rregullt (87’).