Bayern dhe Everton fitojnë bindshëm

Bayern dhe Everton fitojnë bindshëm
Gjiganti gjerman, Bayern Munich, ka deklasuar totalisht ekipin mysafit të Aberdeen, duke e mposhtur me rezultat 5-1, në ndeshjen e kthimit në kuadër të Kupës UEFA, derisa fitore edhe më të thellë ka shënuar Everton ndaj Brann, 6-1.

Një gol i hershëm i shënuar nga Lucio (13’) dërgoi Bayernin në epërsi, derisa një tjetër i shënuar me kokë nga Daniel van Buyten dyfishoi rezultatin e vendasve (36’). Lukas Podolski vazhdoi serinë e golave të bavarezëve, duke shënuar dy herë brenda gjashtë minutash (71’ dhe 77’).

Steve Lovell shënoi golin e nderit për mysafirët (84’), por Mark van Bommel u përgjigj dy minuta më vonë, për të vulosur rezultatin e ndeshjes. Ndeshja e parë mes këtyre dy ekipeve pati përfunduar me rezultat të barabartë, 2-2.

Me rezultat të njëjtë, 5-1, po në fushë të vet fitore ka shënuar edhe Bayer Leverkusen, që luajti përballë ekipit turk, Galatasaray.

Edhe Everton ka shënuar fitore mjaft të thellë në fushë të vet ndaj ekipit Brann, duke e mposhtur me rezultat 6-1. Yakubu Aiyegbeni shënoi hat-trick (36’, 54’ dhe 71’), Andrew Johnson dy gola (41’ dhe 90’) dhe një gol Mikel Arteta (70’), derisa goli i vetëm i mysafirëve u shënua nga Moen (60’).

Nga ndeshjet tjera të Kupës UEFA veçojmë edhe humbjen prej 2-0 të ekipit të kosovarit Lorik Cana, Olimpique Marseille në fushë të ekip rus Spartak Moskës, por që francezët megjithatë kualifikohen për në 16-shen e fundit, falë fitores në ndeshjen e parë, që përfundoi 3-0.

Të kualifikuar më tej janë edhe dy ekipet angleze, Tottenham që barazoi ndaj Slavia Pragës me rezultat 1-1, por që kualifikohet me rezultat të përgjithshëm 3-2, si dhe Bolton Wanderers, që barazoi pa gola me Atletico Madridin, por që kualifikohet falë fitores prej 1-0 në ndeshjen e parë, si mysafir.